الشاعر محمد صلاح عطيطة

الجمعة، 14 سبتمبر 2012

شرود

شباك الحزن

المتعلق

فوق عينك

مهزوم

متهدد بالخلع

كل ما ترمش افراحك

وبرغم الغلق

الفاصل بين الدنيا وبينك

دايما

يتسرب نور البسمه

من ورق الشيش

ويصرخ

يمكن حد يشوفه

ويفتح

الأربعاء، 15 أغسطس 2012

أتزيّنت
البنت اللى جواها
وظهرت للحياه .
دعك الفانوس الولد
وأتفتحله الكنز .
عاشت أنوثه بتتفجر
ف قربه /
وف قربها
كان هوه أغنى الناس .

لضموا حروف الهوى
والدنيا صاحبتهم
بس اللى كان
بيوتر الليله
على قد حرمانها وشوقها
لكلمه حلوه
على قد خوفه
من الثراء السريع

مواسم

فتًّحت قلبك
وابتدى موسم ظهورك
وابتديت :
       - تستقبل النوات
       - رسايل فيها ريحة العشق
       - أحاسيس جديده / قديمه جدا
           تمنحك فرصة وجود
وتنبهك بأنك لسه عايش
وأنت كالعاده ح تحتفل
وتطلق المزازيك ف شعرك
عودٌٌٌ ٌُ حميد
ومع السلامه ،
علشان البرق لما بنشوفه
ما بنعرفشى أمتى
ح يختفى .

السبت، 11 أغسطس 2012

يا دنيتى حنى

يا دنيتي حني
قلبي حمام بني
مكسور جناحه صحيح
لكنه قد الريح
صادق معايا صريح
ولا عمره يوم خني
يادنيتي حني
يا دنيتي كوني
ويايه ع الايام
صوتك ملى سكوني
وسمعت احلى كلام
بس الكلام غالي
وانتى الى بتلالي
فعيون اغاني الناس
وبتهربي مني
يا دنيتي حني
يا دنيتي صاحبي
احلامي والافراح
قلبي اللي متخبي
مش حمل تاني جراح
ردي الحنين تاني
لو كنتي سمعاني
وان كنتي ما سمعتيش
ما تساليش عني
يا دنيتي حني

الثلاثاء، 7 أغسطس 2012

شهيد

متعود
يمسك قصاد امه عشان تدبح
وكان بيسمى ويكبر
فسره قول 200 مره
ولما مشيها سلميه
وكان من قلبه بيكبر
دبحوه قصادها
ولا حد سمى عليه

الاثنين، 6 أغسطس 2012

حبة ندى

هيه حبات الندى

ساعة الفجر

اما يبعت نوره ع البيوت

هوه عنقود العنب

اللى استوى بدرى

وخايف من موسم الحصاد

هيه بالنسباله

اكسير الحياه

والقزازه الوحيده

اللى ممكن تحتوى عرقه

وتخلى من ايامه فوتكا

هوه بالنسبلها نيل

بين جنابه بتحس بامان

واما تغطس جوه ننى عنيه

وتجيب القرار

بتبقى معدنيه

هما اللتنين سيمفونيه

والشوق على سلمهم الموسيقى

محتار بيحلم بالتناغم

واما يبقى ايقاع قلوبهم واقع

سكتهم صبا

رساله

االارض ما بتشربش دم

ولا الزمان ابكم اصم

دم الشهيد ع الارض نار

ف قلوبنا نار مين متهم ؟